Besimi në Librat e All-llahut [Subhanehu ve Teala]

Muslimani beson në të gjitha Librat të cilat i ka shpallur All-llahu i Lartësuar, si edhe në Suhufet të cilat ua ka dhënë disave nga të Dërguarit e Tij. Ai beson se të gjitha këto janë Fjalë e All-llahut, e shpallur të Dërguarve të Tij, përmes së cilës ata do të përcjellin Fenë dhe Ligjin e Tij. Ai, poashtu beson se, nga të gjitha ato, më të rëndësishmet janë katër Libra: Kur´ani - i shpallur të Dëguarit tonë, Muhammedit (SalAllahu Alejhi ve Selem), Teurati – i shpallur të Dëguarit të All-llahut, Musës (Alejhi Selam), Zeburi – i shpallur të Dërguarit të All-llahut, Davudit (Alejhi Selam) dhe Inxhili – i shpallur robit dhe të Dërguarit të All-llahut, Isës (Alejhi Selam). Dhe përfundimisht, ai beson se, prej të gjitha Librave të përmendur, më i rëndësishmi dhe më i zgjedhuri është Kur´ani, i cili ka zëvendësuar të gjitha Ligjet e hershme dhe i ka shfuqizuar rregulloret e tyre. E tërë kjo, në bazë të argumenteve tradicionale dhe racionale, që vijojnë:

ARGUMENTET TRADICIONALE

01. All-llahu i Lartësuar urdhëroi që të besohet në Librat e Tij, me fjalët:

“ O ju që keni besuar! Besoni All-llahun dhe të Dërguarin eTij (Muhammedin a.s.), dhe Librin eTij (Kur´anin) të cilin Ai ia ka zbritur të Dërguarit të Tij dhe Librat e Parë të cilët Ai ua zbriti atyre para tij.”
[En Nisa´, 136]

02. Mbi to, i Lartësuari flet me fjalët:

“ All-llah! Askush nuk meriton të adhurohet përveç Atij. I Përjetshmi, i Pafillim dhe i Pambarim, Mbajtësi dhe Mbrojtësi i gjithçkaje që ekziston. Është Ai i Cili të ka zbritur ty (O Muhammed a.s.) Librin (Kur´anin) me të vërtetën, duke vërtetuar çfarë ka zbritur para tij. Dhe Ai i ka zbritur edhe Teuratin dhe Inxhilin kohë më parë, si udhëheqje për njerëzimin. Dhe Ai zbriti edhe Kriterin (e gjykimit mes të mirës dhe të keqes-Kur´anin).”
[Al Imran, 2-4]

“ Dhe Ne të kemi dërguar ty (O Muhammed a.s.) Librin (Kur´anin) me të vërtetën duke vërtetuar Librat e Parë që patën ardhur para tij dhe Mahajminun (i besueshëm në shkallën më të lartë dhe dëshmues) për ta (Librat e Parë).”
[El Maideh, 48]

“ Dhe Davudit Ne ia dhamë Zeburin.”´
[En Nisa´, 163]

“ Dhe sigurisht që ky (Kur´ani) është Shpallje nga Zoti i Alemit (i Gjithësisë, Zoti i njerëzve dhe xhinëve). Të cilin Ruhu (Meleku Xhibril) i besueshëm e ka zbritur. Në zemrën tënde (O Muhammed) që të mund të jesh prej këshilluesve. (I zbritur) në gjuhën e qartë arabe. Dhe me të vërtetë që ai (Kur´ani dhe zbritja e tij Muhammedit a.s.) është njoftuar në Librat e zbritur popujve të mëparshëm (në Teurat dhe Inxhil)."
[Esh Shuara 192-196]

“ Me të vërtetë që kjo është edhe në Shkrimet e Para. Në Shkrimet e Ibrahimit dhe të Musait (a.s.)”
[El A´la, 18-19]

03. Mbi Librat e All-llahut na ka lajmëruar edhe Pejgamberi ynë, Muhammedi (Alejhi Selam) në hadithet e tij të shumta, nga të cilat po i përmendim këto:

“ Nga kjo botë e juaj, në krahasim me atë që ka kaluar prej saj, ka mbetur vetëm aq sa, prej ikindisë deri në perëndimin e diellit. Pasuesve të Teuratit u është dhënë Teurati dhe kanë vepruar sipas tij deri në drekë, pas së cilës e kanë lëshuar dhe janë dobësuar, dhe kështu u është dhënë në atë masë sa edhe e kishin merituar. Pastaj, pasuesve të Inxhilit u është dhënë Inxhili dhe kanë vepruar sipas tij deri sa është falur ikindia, pas së cilës e kanë lëshuar dhe janë dobësuar, dhe kështu u është dhënë në atë masë sa edhe e kishin merituar. Pastaj, juve u është dhënë Kur´ani, dhe keni vepruar sipas tij deri sa ka perënduar dielli, dhe u jipet dy herë më shumë se sa meritoni. Idhtarët e librit pyetën:´ A të mundohen më pak se ne, ndërsa të shpërblehen më shumë?” dhe All-llahu i pyeti ´A u kam bërë ndonje të padrejtë në drejtat e juaja?´-´Jo´- u përgjigjën – dhe Ai u tha:´Kjo është Mirësia Ime, të Cilën ia jap atij që Unë dua.´”
[Buhariu]

“ Davudit (Alejhi Selam), aq shumë iu patë lehtësuar mësimi, sa që urdhëronte t´i sillen kafshët për kalërium dhe mësonte Teuratin dhe Zeburin para se të shaloheshin ato. Ushqehej vetëm nga puna e duarve të veta.”
[Buhariu]

“ Vetëm dy personave mund t´iu keni lakmi: njeriut të cilit All-llahu ia dha Kur´anin dhe e lexon natë e ditë...”
[Buhariu]

“ Kam lënë në mesin e juaj atë, të cilën, nëse i përmbaheni nuk do të lejojë që pas meje të devijoni: Librin e All-llahut dhe Sunnetin e të Dërguarit të Tij.”
[Hakimi dhe Maliku]

04. Miliona njerëz të shkolluar, të ditur dhe besimtarë në mbarë botën, në të gjitha kohërat dhe hapsirat e ndryshme, besuan dhe besojnë fortë se All-llahu i Lartësuar iu ka shpallur të Dërguarve të Tij Librat e Tij dhe se ata kanë qenë krijesat më të zgjedhura të Tij. Në to, i Lartësuari shpallte vetëm aq sa Ai donte, nga Cilësitë, Fshehtësitë, Ligjet, Feja, Premtimet dhe Kërcënimet e Veta.

ARGUMENTET RACIONALE

01. Dobësia e njeriut dhe varësia e tij nga Krijuesi, në lidhje me mirëmbajtjen, si të trupit të vet, ashtu edhe të shpirtit, parashtruan nevojën ndaj librave me ligje dhe regullore të definuara saktësisht, të cilat do t´i ndihmonin që, në përputhshmëri me to, të mirëmbajë dhe zhvillojë marrëdhëniet me të tjerët dhe të arrijë atë që i nevojitet për jetë, si në këtë, ashtu edhe në botën e ardhme.

02. Duke pasur parasysh se të Dërguarit kanë qenë një lidhje specifike ndërmjet Allllahut- Krijuesit dhe krijesave të Tij dhe se ata kanë jetuar dhe kanë vdekur sikur edhe të tjerët, po të mos ishin librat, të cilat përmbanin doktrinën e tyre, kjo do të shtrembërohej dhe do të humbte pas vdekjes së tyre, me ç´rast njerëzit do të mbeteshin edhe pa të Dërguar edhe pa lidhjen e përmendur, e kjo do të thoshte humbjen e qëllimit thelbësorë të shpalljes dhe misionit të Dërguarve. Që të mos vijë deri te kjo, pa kurrëfarë dyshimi, ishte tejet e nevojshme shpallja e Librave të Zotit.

03. Në rast se, një Dërguar i Zotit, i cili thërriste që të besohet All-llahu, nuk ka sjellë nga Zoti i tij Librin me udhëzim dhe ligj, bota do të fillonte ta përgënjeshtrojë dhe ta mohojë misionin e tij të pejgamberisë. Edhe ky ishte një nga arsyet e shpalljes së Librave të Zotit, ashtu që edhe ato të jenë argument për njerëzit.


Burimi: www.kurandhesunet.net

__________________