Si do të dalin njerëzit nga varret e tyre në Ditën e Ringjalljes

Komiteti i Përhershëm për Kërkim Islamik dhe Fetua
Fetaua Islamije, vëllimi 1, faqe 17


Pyetje: Si do të dalin njerëzit nga varret e tyre në Ditën e Ringjalljes? Dhe, kush do të veshet i pari?


Përgjigje: Allahu do ta ringjallë njeriun në Ditën e Ringjalljes duke e rikrijuar atë nga eshtëri i bishtit [sh.p. fundit të kurrizit] të tij. Njerëzit do të rriten si krijesa të përsosura mu siç rriten bimët nga farat dhe drurët e palmës nga bërthama e hurmës. Ata do të shfaqen nga varret e tyre të zbathur, të zhveshur dhe të pa bërë synet. Ata do të ngarendin përpara sikur karkalecat e shpërndarë, apo fluturat e hallakatura, dhe nuk do ta humbasin rrugën për tek Trualli i Grumbullimit [ku të gjithë njerëzimi do të tubohen]. Në fakt, ata do ta dinë rrugën e tyre më mirë se pëllumbi i egër që e di rrugën për tek çerdhja e tij, përderisa ata po garojnë për tek një shenjë.

Të parit të cilit do t'i plasaritet e çelet toka është pejgamberi ynë Muhamed [salallahu alejhi ue selam]. Ai do të jetë i pari që do të rimarrë vetëdijen. Përsa i përket asaj se kush do të veshet i pari pas Ringjalljes, atëherë ky do të jetë Miku i të Gjithëmëshirshmit [pejgamberi Ibrahim]. Tmerri do të kaplojë njerëzimin deri në pikën kur madje edhe pejgamberët do të thonë në atë Ditë:"Vetja ime, vetja ime!" Ai që lexon ajetet të cilat kanë të bëjnë me Ringjalljen në kaptinat el-Kamer, el-Mearixh, dhe el-Kariah dhe të ngjashme, do të informohet më shumë për këtë ngjarje të madhe.

Është transmetuar në të vërtetë në el-Buhari dhe Muslim, se pejgamberi [salallahu alejhi ue selam] ka thënë:

"Ju do të thirreni në gjyq të zbathur, të zhveshur dhe të pa bërë synet".

Pastaj, ai lexoi e tha:

"Ashtu siç e nisëm krijimin e parë, po ashtu Ne do ta përsërisim atë. Ky është një premtim detyrues për Ne dhe me siguri do ta përmbushim atë". [el-Enbija, 105]

"I pari që do të veshet në Ditën e Ringjalljes është [pejgamberi] Ibrahim, alejhi selam. Ndërsa një grup nga umeti im do të rrëmbehet nga ana e majtë, unë do të thërrasë:"Pasuesit e mi!" Do të thuhet:"Këta kanë lëshuar fenë pasi i le [vdiqe] ata". Dhe pastaj do të them siç ka thënë adhuruesi i Zotit [pejgamberi Isa [Jezusi], alejhi selam]" [Sahi el-Buhari, nr.3349; Sahi Muslim, nr.2860]:

"Dhe unë qeshë dëshmitar ndaj tyre për sa kohë që qëndrova me ta. Por kur më more, Ti mbete Vëzhgues mbi ta dhe Ti je dëshmitar për gjithçka. Nëse i dënon ata, ata janë adhuruesit e Tu; nëse i fal ata, Ti je i Gjithëpushtetshmi, i Urti". [el-Ma'ideh, 117-118]

Është transmetuar në të vërtetë që pejgamberi [salallahu alejhi ue selam] ka thënë:

"Njerëzimi në Ditën e Ringjalljes do të tronditet deri në zalisje [t'u bie të fikët], dhe unë do të jem i pari të cilit do t'i plasaritet e çelet toka". [Sahi el-Buhari, nr.2412]

Po ashtu është transmetuar në të vërtetë që pejgamberi [salallahu alejhi ue selam] ka thënë:

"Unë do të jem i pari që do të rimarrë vetëdijën". [Sahi el-Buhari, nr.4638]

Ju mund të merrni detaje të mëtejshme lidhur me hadithet e mësipërme nga libri "el-Akide et-Tehauije" të Imam et-Tehauit [me shpjegim të Imam Ebil-Izz el-Hanefi], që flet për gjendjen e njërëzve në Ditën e Gjykimit.

Me Allahun është i gjithë suksesi. Dhe Allahu dërgoftë përshëndetje dhe bekime mbi pejgamberin tonë [salallahu alejhi ue selam], mbi familjen e tij dhe shoqëruesit e tij.