Pyetje: Cili është vendimi mbi festimin e natës së Israsë dhe Miraxhit, e cila bie në natën e njëzeteshtatë të muajit rexheb?


Përgjigje: S’ka dyshim që Israja dhe Miraxhi [udhëtimi dhe ngritja e pejgamberit në qiell] janë dy shenja të mëdha, të cilat tregojnë për vërtetësinë e të dërguarit të Tij Muhamed [salallahu alejhi ue selam], si dhe për madhështinë e pozitës së tij tek Allahu. Këto, po ashtu, janë shenja të fuqisë së madhe të Allahut dhe të pozitës së lartë të Tij mbi krijesat. Allahu ka thënë:

» I madhëruar e i lartësuar qoftë Ai [Allahu] që mori robin e Tij [Muhamedin] për një udhëtim nate nga el-Mesxhid el-Haram [në Meke] deri në el-Mesxhid el-Aksa [në Jerusalem], fqinjërinë e së cilës e kemi bekuar, me qëllim që t’ia tregojmë atij Shenjat Tona. Vërtet, Ai dëgjon gjithçka, sheh gjithçka « [el-Isra, 1]

Ka transmetime mutewatir1 nga i dërguari i Allahut [salallahu alejhi ue selam] se ai është ngritur në qiej dhe portat e tyre i janë hapur atij, derisa ka kaluar përtej qiellit të shtatë, ku Zoti i tij i ka folur ashtu siç ka dashur dhe e ka urdhëruar për pesë namazet ditore. Së pari, Allahu i lartësuar ka urdhëruar për pesëdhjetë namaze, por pejgamberi jonë vazhdonte të kthehej dhe të kërkonte zbritje, derisa Ai i bëri pesë. Kështu, mbeten pesë namaze të detyrueshme, por që janë sa pesëdhjetë në shpërblim, sepse çdo e mirë shpërblehet dhjetëfish. Allahut i takojnë lavdërimet dhe falënderimet për të gjitha bekimet e Tij.

Sa i përket kësaj nate, në të cilën zunë vend Israja dhe Miraxhi, s’ka asgjë në hadithet e vërteta që tregon se kjo ka ndodhur në muajin rexheb apo në ndonjë muaj tjetër. Gjithçka që është transmetuar lidhur me një datë të caktuar për këto ngjarje, sipas dijetarëve të hadithit, s’mund të dëshmohet të ketë ardhur nga pejgamberi [salallahu alejhi ue selam]. Ka një urtësi nga Allahu në harresën e kësaj date nga ana e njerëzve. Edhe nëse do të vërtetohej data, s’do të ishte e lejueshme për muslimanët ta festonin atë, sepse pejgamberi [salallahu alejhi ue selam] nuk e ka festuar atë dhe nuk e ka veçuar në ndonjë mënyrë. Nëse festimi i kësaj nate do të ishte urdhëruar në Islam, i Dërguari do ta informonte umetin e tij rreth kësaj me fjalë a vepra. Po të ndodhte diçka e këtillë, do të ishte e mirënjohur dhe shoqëruesit e tij do ta transmetonin këtë. Ata kanë transmetuar gjithçka nga pejgamberi [salallahu alejhi ue selam] që umeti i tij ka nevojë ta dijë, dhe nuk kanë lënë pas dore asnjë aspekt të fesë, madje kanë qenë të parët për të bërë ndonjë të mirë. Sikur festimi i kësaj nate të ishte urdhëruar në Islam, ata do të ishin njerëzit e parë që do ta bënin këtë. Pejgamberi ka qenë njeriu më i sinqertë dhe ai e ka bartur fenë plotësisht. Sikur të ishin përnderimi dhe festimi i kësaj nate pjesë e fesë së Allahut, atëherë pejgamberi [salallahu alejhi ue selam] do ta bënte këtë dhe s’do ta fshehte. Meqë s’ka ndodhur diçka e këtillë, është e mirënjohur që festimi dhe përnderimi i kësaj s’është fare pjesë e Islamit. Allahu e ka përsosur fenë për këtë umet dhe e ka plotësuar favorin e Tij ndaj tyre, dhe Ai i dënon ata që prezantojnë gjëra në fe për të cilat Allahu nuk ka urdhëruar. Allahu ka thënë në Librin e Tij, në suren Ma’ideh:

» Këtë ditë, përsosa fenë tuaj për ju, plotësova favorin Tim ndaj jush dhe zgjodha Islamin për fe tuajën « [el-Ma’ideh, 3]

» Apo a kanë ata ortakë me Allahun [zota të rremë], të cilët kanë themeluar për ta një fe që Allahu nuk ka urdhëruar për të « [el-Shura, 21]

Në hadithin sahi, është dëshmuar se i dërguri i Allahut [salallahu alejhi ue selam] ka paralajmëruar kundra bidatit dhe ka thënë qartë se bidati është humbje, sa për t’i treguar umetit se sa e rëndë e serioze është kjo çështje.

Për shembull, është transmetuar në el-Sahihajn nga A’isha [Allahu qoftë i kënaqur me të] se pejgamberi [salallahu alejhi ue selam] ka thënë:

"Kushdo që prezanton në këtë çështje tonën ndonjë gjë që s'është pjesë e saj, do t'i refuzohet".

Në transmetimin nga Muslim, thuhet:

"Kushdo që bën ndonjë vepër që s'është pjesë e kësaj çështjeje tonë, do t'i refuzohet".

Në Sahi Muslim, është transmetuar se Xhabir ka thënë:"I dërguari i Allahut thoshte në hutbe:

'Fjalimi më i mirë është Libri i Allahut, udhëzimi më i mirë është udhëzimi i Muhamedit. Çështjet më të këqija janë çështjet e shpikura, dhe çdo shpikje është humbje'". En-Nesa'i shtoi, me isnad të mirë:"… dhe çdo humbje do të jetë në Zjarr".

Në el-Sunen, është transmetuar se el-Irbad ibn Sarijeh ka thënë:"I dërguari i Allahut mbajti një ligjëratë elokuente, e cila na i zbuti zemrat dhe bëri që syri të lotonte. Thamë:
- O i dërguar i Allahut, sikur po përshëndetesh me ne! Na këshillo.
- Ju këshilloj ta keni frikë Allahun, të dëgjoni e të bindeni, edhe nëse për udhëheqës e keni një rob. Kushdo prej jush që do të jetojë, do të shohë kundërshtime të mëdha, kështu që ju nxis të kapeni për Sunetin tim dhe për sunetin e halifeve të udhëzuar si duhet, që do të vijnë pas meje dhe do t'i përmbahen atij [Sunetit]. Kini kujdes nga çështjet e shpikura [në fe], se, vërtet, çështjet e shpikura janë bidat, kurse çdo bidat është humbje".

Ka shumë hadithe me domethënie të ngjashme.

Paralajmërimet kundra bidatit janë transmetuar nga shoqëruesit e të dërguarit të Allahut [salallahu alejhi ue selam]dhe nga selefët e drejtë, pas tyre, sepse kjo s'është gjë tjetër veçse shtim në fe dhe formim i një feje për të cilën Allahu nuk ka urdhëruar, si dhe është imitim i armiqve të Allahut, çifutëve dhe të krishterëve, në shtimin e tyre në fetë e tyre dhe prezantimin e gjërave për të cilat Allahu nuk ka urdhëruar. Kjo, po ashtu, nënkupton se diçka po mungon në Islam dhe se feja s'është e plotësuar, kurse dihet mirë që kjo çon në ligësi dhe në një të keqe të madhe, si dhe kundërshton ajetin ku Allahu ka thënë:

» Këtë ditë, përsosa fenë tuaj për ju, plotësova favorin Tim ndaj jush dhe zgjodha Islamin për fe tuajën « [el-Ma’ideh, 3]

Kjo kundërshton edhe hadithin e të dërguarit [salallahu alejhi ue selam], i cili paralajmëron kundra bidatit.

Shpresoj që dëshmitë e cituara do të jenë të mjaftueshme për të bindur kërkuesin e së vërtetës se ky bidat është i gabuar, domethënë, bidati i festimit të natës së Israsë dhe Miraxhit, dhe se kjo s'është aspak pjesë e fesë Islame.

Sepse Allahu ka urdhëruar për të qenë i sinqertë ndaj muslimanëve dhe për të shpjeguar çfarë Allahu ka urdhëruar për ta në fenë e tyre. Dhe, ngaqë është haram të fshehësh dijen, mendova ta vë në pah këtë bidat, i cili është përhapur aq shumë, saqë njerëzit besojnë se është pjesë e fesë.

Allahu është Ai, që e lusim për t'i ndrequr punët e muslimanëve, për të na bekuar me dijen islamike dhe për të na ndihmuar të mbahemi fort për të vërtetën dhe të lëmë gjithçka që e kundërshton atë, se Ai ka mundësi për këtë. Allahu dërgoftë paqe dhe bekime mbi robin dhe të dërguarin e Tij, pejgamberin tonë Muhamed, mbi familjen dhe mbi shoqëruesit e tij.

1. Hadith i transmetuar nga një numër domethënës transmetuesish në secilin zinxhir të transmetimit [isnad], nëpërmjet zinxhirëve të shumëfisht të transmetimeve që mbërrijnë deri te pejgamberi [salallahu alejhi ue selam]. Kjo vërteton se hadithi është sahih përtej çdo dyshimi të arsyeshëm dhe përtej mundësisë historike se transmetuesit kanë mundur të komplotonin për të falsifikuar një transmetim.