Së pari, do të filloj me atë që ka të bëjë me abdesin. Por, para kësaj, do të flas rreth edukatës në kryerjen e nevojës, si urinimi dhe jashtëqitja. Muslimani është urdhëruar që, kur të kryejë nevojën, të largohet [nga njerëzit]. Kjo bazohet në atë që është transmetuar nga el-Mughireh bin Shu'beh, i cili ka thënë:

"I dërguari i Allahut [salallahu alejhi ue selam] më tha:'Mbajë këtë enë', pastaj u largua, derisa humbi nga pamja ime, dhe kreu nevojën". [el-Buhari & Muslim]

Ky hadith është dëshmi se personi duhet të fshihet nga njerëzit, kur të kryejë nevojën. Në Sunen të Ebu Daud, me zinxhirë të mirë të transmetimit, el-Mughireh bin Shu'beh ka transmetuar:

"Kur i dërguari i Allahut kishte nevojë të urinonte, largohej".

Dhe, në Sunen Ebu Daud, me transmetim hasen li-gajrihi [i pranueshëm për shkak të mbështetjes], Xhabir ibn Abdullah ka transmetuar:

"Kur i dërguari i Allahut donte të kryente nevojën, largohej, derisa nuk mund të shihej nga të tjerët".

Po ashtu, muslimani është urdhëruar që, para se të hyjë në nevojtore, qoftë brenda në shtëpi apo jashtë saj, të thotë para se të hyjë në nevojtore apo kur të ulet jashtë:"Allahume inni eudhu bike min el-khubuthi uel-khaba'ith/O Allah, vërtet, kërkoj shpëtim tek Ti nga shejtanët meshkuj e femra".

Domethënia e eudhu bike është: kërkoj shpëtim tek Ti. El-Khubuth do të thotë shejtanë meshkuj, kurse el-khabaith do të thotë shejtanë femra. Pra, personi kërkon shpëtim apo mbrojtje nga e keqja e tyre. Kjo, sepse hapësirat e nevojtoreve janë vendbanime të shejtanëve, siç është transmetuar nga Zejd bin Erkam në Sunen Ebi Daud, i cili ka kallëzuar se i dërguari i Allahut ka thënë:

"Vërtet, këto nevojtore janë të banuara, kështu që, kur ndonjëri prej jush të hyjë në hapësirën e nevojtores, duhet të thotë:'Allahume inni eudhu bike min el-khubuthi uel-khaba'ith'". Zinxhiri i këtij transmetimi është autentik.

Personi duhet të thotë bismilah, para se të thotë Allahume inni eudhu bike min el-khubuthi uel-khaba'ith, për shkak të asaj që është transmetuar nga Ali [radijallahu anhu], i cili ka thënë:

"I dërguari i Allahut ka thënë:'Mbulesa mes xhinit dhe organeve gjenitale të njeriut, kur ai hyn në hapësirën e nevojtores, është që ai të thotë bismilah/me emrin e Allahut'". [Transmetuar nga et-Tirmidhi dhe Ibn Maxheh, dhe zinxhiri i tij i transmetimit është i pranueshëm [hasen], për shkak të dëshmive mbështetëse].

Personi s'bën të ngrejë veshjen e vet, derisa të ulet, bazuar në atë që el-Bejheki ka transmetuar me një zinxhirë të mirë të transmetimit nga Ibn Umer se:

"I dërguari i Allahut nuk e ngrinte teshën e vet, derisa ulej afër tokës".

Po ashtu, ai fshihej/mbulohej nga njerëzit, bazuar në atë që ka transmetuar Ebu Daud nga Aisha [radijallahu anha], me një zinxhirë të mirë të transmetimit, sipas el-Hafidh ibn Haxher, se ajo ka thënë:"I dërguari i Allahu ka thënë:

'Kushdo që do të kryejë nevojën, le të fshihet'".

Kjo bazohet në atë që ka transmetuar Muslim nga Abdullah ibn Xhafer:

"Gjëja më e preferuar e të dërguarit të Allahu, kur ai fshihej/mbulohej ndërsa kryente nevojën, ka qenë një hapësirë e gjerë, me pengesa të mëdha, apo një gardh me drurë palme".

Muslimanit i është ndaluar të kryejë nevojën në rrugë që shfrytëzohet nga njerëzit dhe në hapësirën e hijezuar, ku ulen njerëzit. Kjo bazohet në atë që ka transmetuar Ebu Hurejre nga i dërguari i Allahut:

"Ruhuni nga dy gjëra që tërheqin mallkimin [e njerëzve ndaj jush]: kryerja e nevojës në rrugën që shfrytëzohet nga njerëzit dhe në hapësirën e hijezuar të tyre". [Transmeton Muslim]

Kjo vlen për gjithçka që shfrytëzojnë njerëzit, qoftë rrugë, ndonjë hapësirë e hijezuar, hapësirë ku ka pemë apo hapësirat ujore [dmth për larje]. Nuk është e lejueshme të kryhet nevoja në këto vende, sepse do të bëheshin të papastra për muslimanët e tjerë.

Po ashtu, muslimanit i është ndaluar të vendoset përballë kiblës apo t'ia kthejë shpinën asaj, kur kryen nevojën, posaçërisht gjatë jashtëqitjes. Kjo është për shkak të asaj që Ebu Ejub el-Ensari ka transmetuar nga i dërguari i Allahut:

"Kur të kryeni nevojën, mos u ktheni nga kibla e as mos ia ktheni shpinën, por kthehuni nga lindja apo nga perëndimi". Ky hadith është i vërtetë [el-Buhari & Muslim]. Për më shumë, ky hadith u është drejtuar banorëve të Medinës, sepse për ta kibla është drejtimi nga jugu.

Po ashtu, kjo bazohet në atë që ka transmetuar Ebu Hurejra nga i dërguari i Allahut:

"Kur ndonjëri prej jush ulet për të kryer nevojën, të mos kthehet në drejtim të kiblës e as të mos ia kthejë shpinën asaj".

Për sa i përket Istinxhas, që është heqja e papastërtisë nga organet përkatëse, pas kryerjes së nevojës, muslimani ka mundësi të zgjedhë mes përdorimit të ujit dhe gurëve.

Kështu, nëse ai arrin të pastrohet me ujë, kjo është e vlefshme, bazuar në atë që kanë transmetuar el-Buhari dhe Muslim nga Enes:

"I dërguari i Allahut hynte në hapësirën e nevojtores ndërsa unë, së bashku me një djalë, i mbanim një shtambë uji dhe një shtizë në ndonjërën nga anët, dhe ai pastrohej me ujë".

Shtiza futej në tokë dhe një teshë vendosej në të, në mënyrë që ai të fshihej nga pamja e njerëzve.

Nëse personi arrin të pastrohet me anë të gurëve apo me çfarëdo që e zë vendin e kësaj, si letër tualeti apo llojet e saj, veprimi i tij është i vlefshëm dhe i pranueshëm. Kjo bazohet në atë që është transmetuar nga el-Buhari nga hadithi i Ebu Hurejres:

"Përcolla të dërguarin e Allahut, kur ai doli të kryente nevojën, dhe ai e kishte zakon të mos kthehej [për të shikuar pas shpine]. Iu afrova dhe ai më tha:'Më sill ca gurë që të pastrohem, dhe mos më sill asht apo bajgë'. Unë i prura gurë me qoshen e teshës sime dhe i vendosa pranë tij. Pastaj u ktheva dhe, kur ai kreu nevojën, i përdori gurët".

Po ashtu, kjo bazohet në atë që el-Buhari ka transmetuar nga Ibn Mes'ud:

"Pejgamberi shkoi për të kryer nevojën dhe më urdhëroi t'i sillja tre gurë".

Kombinimi i ujit dhe gurëve është më i pëlqyeshmi. Por, nëse për këtë s'ka mundësi, uji është më i mirë, sepse heq çdo gjurmë të papastërtisë. Personi s'bën ta përdorë dorën e djathtë, kur të pastrohet nga ndyrësitë, bazuar në hadithin e lartpërmendur të Selmanit [radijallahu anhu].

Po ashtu, personi s'bën ta kapë penisin me dorën e djathtë ndërsa urinon, për shkak të asaj që kanë transmetuar el-Buhari dhe Muslim nga Ebu Katade se i dërguari i Allahut ka thënë:

"Asnjëri prej jush të mos e prek penisin me dorën e djathtë ndërsa urinon dhe asnjëri prej jush të mos pastrohet me dorën e djathtë pas kryerjes së nevojës".

Njëlloj, muslimanit i është ndaluar pastrimi me plehra dhe me eshtra, apo me diçka që është e paprekshme, bazuar në hadithin e lartpërmendur të Selmanit dhe, po ashtu, nga hadithi i Xhabirit, i cili gjendet në Sahi Muslim:

"I dërguari i Allahut na e ka ndaluar pastrimin me bajgë dhe me eshtra".

Arsyeja për këtë ndalim është përmendur në Sahi Muslim, në hadithin e Ibn Mes'ud, në atë se eshtrat janë ushqim për xhinët. [Derisa eshtrat t'u jenë në dispozicion xhinëve] Allahu i mbulon ato me më shumë mish sesa që kishin më parë. Sa i përket bajgës, kjo është ushqim për kafshët e tyre [të xhinëve] të hipjes.

Kjo vlen edhe për ushqimin e njerëzve dhe ushqimin e kafshëve të tyre të hipjes. Pra, s'është i lejueshëm pastrimi me këto.

Në fund, kur personi dëshiron të dalë nga hapësira e nevojtores, duhet të thotë çfarë është transmetuar në Sunen të Ebu Daud nga hadithi i Aishes:

"Kur i dërguari i Allahut dilte nga hapësira e nevojtores, thoshte ghufraneke/kërkoj falje nga Ti".

Arsyeja për këtë është se, meqë Allahu e ka çliruar nga gjërat e dëmshme [jashtëqitja], është me vend që t'i bëhet lutje Atij ta çlirojë edhe nga dëmi i mëkateve.

Marrë nga libri es-Salat i shejh Abdullah bin Salih el-Ubejlan

__________________
“Dhe Fitneja është më e keqe se vrasja.“ (El Bekare 191)