Kapitulli i pritjes dhe i mbajtjes së zisë

**Usame_ibn_Zejd** · #1 (**permalink**) 24-02-2007, 13:56

KAPITULLI I PRITJES DHE I MBAJTJES SË ZISË

MBAJTJA E ZISË PËR VDEKJEN E BURRIT
GRATË E MOSHUARA DUHET TË MBAJNË ZI
LARGIMI NGA SHTËPIA E BURRIT
MBAJTJA E ZISË DHE VAZHDIMI I SHKOLLËS
VDEKJA E BURRIT PAS BËRJES SË AKTIT TË MARTESËS
VESHJA E RROBAVE TË ZEZA NUK KA BAZË NË ISLAM

MBAJTJA E ZISË PËR VDEKJEN E BURRIT

Pyetje: Ç’duhet të bëjë gruaja pas vdekjes së të shoqit?

Përgjigje: Gruaja, së cilës i ka vdekur burri, duhet të bëjë gjërat e mëposhtme:

1 - Nuk duhet të dalë nga shtëpia ku banonte në kohën kur i ka vdekur i shoqi, derisa të plotësohet afati i pritjes, e cila për gratë joshtatzëna është katër muaj e dhjetë ditë, ndërsa për shtatzënat mbaron pas lindjes së fëmijës. Allahu i Mafhëruar thotë:
"... Ndërsa për shtatzënat, afati i pritjes është derisa të lindin." (65:4)
Pra ajo nuk duhet të dalë nga shtëpia, veçse në rast nevoje: p.sh. për të shkuar në ambulancë apo për të blerë ushqime, nëse nuk ka se kush t’ia kryejë këtë gjë. Gjithashtu, asaj i lejohet të dalë nëse prishet shtëpia ku banon apo nëse nuk ka njeri që të qëndrojë me të dhe ajo frikohet vetëm.

2 - Duhet të veshë rroba të thjeshta, pa zbukurime. Nuk ka rëndësi se ç’ngjyrë janë këto rroba: të zeza, të gjelbra, të kuqe apo ndonjë ngjyrë tjetër, kryesorja është që të mos jenë të zbukuruara, sepse kështu ka urdhëruar Profeti (paqja qoftë mbi të).

3 - Nuk duhet të përdorë asnjë erë të mirë, përveç nëse pastron gjakun e menstruacioneve, por edhe në këtë rast duhet të përdorë sasi të vogla. Gjithashtu, asaj i lejohet përdorimi i sapunit oër t’u larë.

4 - Nuk duhet t’i lyejë sytë apo të zbukurojë fytyrën.

5 - Nuk duhet të vendosë zbukurime prej ari, argjendi apo diamanti, pa marrë parasysh nëse janë varëse, bylyzykë, unaza etj.
Të gjitha zakonet e tjera të përhapura te shumë njerëz (si p.sh. gruaja gjatë zisë nukj duhet të flasë me askënd, nuk duhet të lahet më tepër se një herë në javë, nuk duhet të ecë këmbëzbathur në shtëpi, nuk duhet të dalë në dritën e hënës etj.), nuk kanë asnjë bazë në Islam. Asaj i lejohet t’i bëjë të gjitha gjërat e mësipërme, pasi nuk ka asnjë argument që t’i ndalojë ato.
Nëse dikush dëshiron të martohet me një grua, e cila është në pritje, atij i lejohet që ta shprehë dëshirën e tij tërthorazi dhe jo direkt.
Ibn Bazi

GRATË E MOSHUARA DUHET TË MBAJNË ZI

Pyetje: Përse duhet të mbajnë zi gratë e shkuara në moshë, kur dihet fare mirë që ato nuk lindin fëmijë? Përse gratë shtatzëna duhet të presin derisa të lindin që të mbarojë koha e zisë së tyre, pasi me sa di unë, mbajtja e zisë bëhet me qëllim që të merret vesh nëse gruaja është shtatzënë apo jo.

Përgjigje: Gratë e moshuara, megjithëse nuk lindin fëmijë, duhet të mbajnë zi njësoj si gratë e reja, pra ka tër muaj e dhjetë ditë, sepse nuk ka ardhur ndonjë argument që t’i veçojë ato nga të tjerat. Allahu i Madhëruar thotë:
"Dhe gratë e atyre që vdesin prej jush, duhet të presin katër muaj e dhjetë ditë (para se të martohen përsëri)." (2:234)
Lidhja bashkëshortore është një nga lidhjet më të fuqishme dhe njëkohësisht më të rëndësishme për jetën e individit dhe shoqërisë; për këtë arsye Islami e urdhëron femrën, edhe nëse është e moshuar e nuk mund të lindë fëmijë, që të mbajë zi në shenjë respekti e nderimi për këtë lidhje të shenjtë dhe për kujtimin e shokut të saj të jetës dhe njëkohësisht për të shprehur dhimbjen dhe hidhërimin e shkaktuar nga humbja e tij. Nga sa përmendëm më lart mund të kuptojmë se përse periudha e mbajtjes së zisë për humbjen e prindërve, fëmjëve apo dikujt tjetër.
Për gratë shtatzëna, afati i mbajtjes së zisë mbaron pas lindjes së fëmijës, pasi ajeti i mëposhtëm ["...Për shtatzënat afati i pritjes është derisa të lindin." (65:4)], i veçon ato nga gratë e tjera, afati i pritjes për të cilat përcaktohet në ajetin e përmendur në fillim të përgjigjes. Nga ana tjetër, foshnja që ndodhet në barkun e saj është e burrit të parë, e nëse ajo do të martohej përsëri, do të ndodhte ajo që ka kaluar Pejgamberi (paqja qoftë mbi të) në hadithin e mëposhtëm:
"Ai musliman që beson Allahun dhe Ditën e Gjykomit, nuk duhet të ujisë me ujin e tij të mbjellurat e dikujt tjetër." (Transmeton Imam Ahmedi, Ebu Davudi dhe Ibn Hibbani)
Në mbyllje mund të themi se detyra e çdo muslimani është që t’i zbatojë rregullat e Sheriatit Islam, pavarësisht nëse është në gjendje që të kuptojë qëllimin dhe shkakun e vendosjes së tyre, duke besuar që pas ekzistencës dhe krijimit të çdo gjëje, fshihet Urtësia dhe Dija e plotë e Allahut.
Komisioni i Përhershëm

LARGIMI NGA SHTËPIA E BURRIT

Pyetje: A i lejohet gruas së cilës i ka vdekur burri që të lërë shtëpinë e burrit dhe të jetojë në shtëpinë e saj, gjatë periudhës së zisë, duke pasur parasysh që në vendin e të shoqit ajo nuk ka asnjë të afërm?

Përgjigje: Nëse gruaja nuk është e sigurt në shtëpinë e burrit dhe frikësohet për veten apo për nderin e saj, atëherë i lejohet që të largohet nga shtëpia e burrit dhe të shkojë te prindërit e saj, apo në çfarëdo lloj vendi ku mendohet se është e sigurt. Mirëpo nëse në shtëpinë e të shoqit nuk ikanoset asnjë rrezik, por thjesht dëshiron që të jetë afër prindërve të saj, atëherë asaj nuk i lejohet që të largohet nga shtëpia e burrit, derisa të mbarojë afati i mbajtjes së zisë.
Komisioni i Përhershëm

MBAJTJA E ZISË DHE VAZHDIMI I SHKOLLËS

Pyetje: I shoqi i një të afërmeje time vdiq në kohën kur ajo vazhdonte studimet në vitin e katërt. A i lejohet asaj që të dalë prej shtëpisë për të ndjekur leksionet?

Përgjigje: Gruaja, së cilës i ka vdekur i shoqi, duhet ta kalojë kohën e pritjes në shtëpinë ku jetonte në kohën që ka vdekur ai. Ajo nuk duhet të dalë prej saj, vetëm në rast nevoje dhe në të njëjtën kohë nuk duhet të vendosë erëra të mira, nuk duhe të lyejë sytë dhe nuk duhet të veshë rroba me zbukurime.
Gruajës, për të cilën pyet pyetësja, i lejohet që të dalë nga shtëpia për të ndjekur leksionet, pasi ajo ka nevojë që të dëgjojë shpjegimin e mësuesve për t’i kuptuar ato, por bë të njëjtën kohë duhet të largohet prej atyre gjërave që tërheqin vëmendjen e burrave.
Komisioni i Përhershëm

VDEKJA E BURRIT PAS BËRJES SË AKTIT TË MARTESËS

Pyetje: I shoqi i një të afërmeje time vdiq disa ditë pas bërjes së aktit të martesës. A duhet të mbajë zi kjo grua, duke pasur parasysh se nuk ka shkuar akoma në shtëpinë e tij?

Përgjigje: Gruaja, burri i së cilës vdes pas aktit të martesës duhet të mbajë zi si të gjitha gratë e tjera, edhe nëse nuk e kanë bërë akoma dasmën, sepse, menjëherë pas aktit të martesës, ajo konsiderohet si gruaja e tij. Allahu i Madhëruar thotë:
"Dhe gratë e atyre që vdesin prej jush, duhet të presin katër muaj e dhjetë ditë (para se të martohe përsëri)." (2:234)
Po ashtu, në një hadith të transmetuar nga Buhariu dhe md, Pejgamberi (paqja qoftë mbi të) ka thënë:
"Gruas nuk i lejohet të mbajë zi më tepër se tri ditë për ndonjë të vdekur, përveçse për të shoqin, për të cilin duhet të mbajë zi katër muaj e dhjetë ditë."
Në një hadith tjetër të transmetuar nga Ahmedi, thuhet se Pejgamberi (paqja qoftë mbi të) urdhëroi një grua, së cilës i kishte vdekur burri pas aktit të martesës, qëtë mbante zi për vdekjen e tij.
Komisioni i Përhershëm

VESHJA E RROBAVE TË ZEZA NUK KA BAZË NË ISLAM

Pyetje: A lejohet veshja e rrpbave të zeza në shenjë pikëllimi për vdekjen e ndokujt, sidomos nëse bëhet fjalë për vdekjen e burrit?

Përgjigje: Veshja e rrobave të zeza, në raste fatkeqësish, është diçka e papëlqyeshme dhe e kotë, pasi nuk ka asnjë bazë në Islam. Profeti (paqja qoftë mbi të) na ka mësuar që në të tilla raste të themi:
"Të Allahut jemi dhe tek Ai do të kthehemi. O Zot, më shpërble mua për këtë të keqe që më ka rënë dhe ma zëvendëso me diçka të mirë."
Nëse muslimani e thotë këtë lutje me besim të patundur tek Allahu dhe me shpresë të plotë te shpërblimi i Tij, atëherë Ai do ta shpërblejë atë dhe do t’ia kompensojë fatkeqësinë me diçka më të mirë.
Ibn Uthejmini