Muslimanët janë urdhëruar nga i dashuri i tyre - Muhammedi alejhi selam që ta përshëndesin njëri-tjetrin kur të takohen.
E shtunë, 28 Qershor 2008 13:58
Përshëndetja duhet të jetë me "selam" që do të thotë paqe, respektivisht, njëri thotë: "Es-selamu alejkum!", kurse tjetri ia kthen "We alejkumu selam!". Kjo (shprehje) bën të ditur se ata (dy të takuarit) duke komunikuar i sigurojnë njëri-tjetrit hapësirë të paqshme, edhe atë, përmes kësaj përshëndetjeje, pra, nënkuptohet: "Ji i sigurt se jeta, pasuria dhe nderi yt është i sigurt në duart e mia!". Kur`ani Famëmadh i nxit besimtarët që t'i përshëndesin të tjerët me përshëndetje edhe më të mirë, përderisa edhe Pejgamberi alejhi selam ka garantuar shpërblime të pamasa në botën tjetër si dhe shumë bekime e begati qysh në këtë botë, imagjinoni, vetëm nëpërmjet një përshëndetjeje! Të përshëndeturit e shuan emocionin e të qenët i ashpër, e zvogëlon djallëzinë si dhe urrejtjen dhe, në anën tjetër, i jep shtysë vëllazërisë dhe miqësisë. Ai (të përshëndeturit), gjithashtu, e shemb ndjenjën e krenarisë së klasës së lartë dhe njëkohësisht promovon barazi. Për më tej, Pejgamberi alejhi selam ishte që i udhëzoi pasuesit e vet se kush të përshëndesë i pari. Pra, ai ka thënë që ai që është në mjet transportiv duhet ta përshëndesë atë që është duke ecur; ai që është duke ecur duhet ta përshëndesë atë që është ulur; grupi më i pakët duhet ta përshëndesë grupin më të madh dhe se më të vegjëlit duhet të parët t'i përshëndesin më të vjetrit. Këto direktiva e sugjerime i presin në gjysmë ndasitë e dallimet sociale të cilat i shkallëzojnë njerëzit në nivele.
Pra, është detyrë e besimtarit që ta përshëndesë besimtarin tjetër kurdoherë që e takon. Për më tepër, më i miri prej njerëzve është ai që i pari jep përshëndetje. Përshëndetja (selami) sjell shpërblime të shumta, e kur të shoqërohet me lutje që edhe begatitë e mëshira e të Lartësuarit të jenë të merituara për personin ndaj të cilit e drejton përshëndetjen, shpërblimet janë edhe më të mëdha. Trajta më e mirë e Islamit është kur t'u japësh ushqim nevojtarëve dhe kur t'i përshëndesësh të gjithë, pa marrë parasysh a i njeh apo jo. Edhe në rastin kur besimtari hyn në shtëpi, është i obliguar që t'i përshëndesë anëtarët e shtëpisë.
Forma më e mirë e të përshëndeturit është me dorë dhe se është mirë që të bëhet më të dy duart. Megjithatë, meshkujve u është ndaluar që t'u flasin për dore femrave! Të përshëndeturit me dorë paraqet dashuri dhe dhembshuri mes muslimanëve. Të përqafuarit dhe puthjet, gjithashtu, janë prej gjërave të inkurajuara, porse nuk duhet harruar që këto dy elemente të zbatohen tek bijtë e vetë individit!

Argumente nga Kur`ani

1) "Kur përshëndeteni me ndonjë përshëndetje, ju ktheni përshëndetje edhe më të mirë, ose kthejeni ashtu! All-llahu llogarit për çdo send!" (Kur'an, 4: 86).
2) "...Ata i thërrasin banuesit e Xhennetit: "Paqja (shpëtimi) qoftë mbi ju!"...!" (Kur'an, 7: 46).
3) "O ju që besuat, mos hyni në shtëpi të huaja pa kërkuar leje dhe pa i përshëndetur njerëzit e saj! Kjo është më mirë për ju, në mënyrë që të merrni mësim!" (Kur'an, 24: 27).
4) "...Kur të hyni në ndonjë shtëpi, përshëndetni (ata që janë në të) me një përshëndetje të caktuar nga All-llahu (me "Es-selamun alejkum") që është e bekuar dhe e këndshme! Kështu All-llahu jua sqaron argumentet që t'i kuptoni!" (Kur'an, 24: 61).
5) "A ke arritur të dëgjosh ti për rrëfimin e mysafirëve të ndershëm të Ibrahimit? Kur patën hyrë te ai dhe thanë: "Të përshendesim me paqë!", ai tha: "Qofshi gjithnjë të përshëndetur me paqë!", (e në vete tha) njerëz të panjohur!" (Kur'an, 51: 24-25).

Argumente nga Sunneti

1. Ebu Hurejra (All-llahu qoftë i kënaqur prej tij!) rrëfen se Pejgamberi alejhi selam ka thënë: "Kur All-llahu i Lartësuar e krijoi Ademin alejhi selam, i tha: "Shko dhe përshëndeti atë grup engjujsh dhe dëgjo se si do ta kthejnë përshëndetjen, ngase ajo do të jetë përshëndetja jote dhe e burimit (pasardhësve) tënd!". Ademi alejhi selam vajti dhe u tha: "Paqja qoftë mbi juve!", ndërsa enjujt ia kthyen: "Paqja dhe mëshira e All-llahut qoftë edhe mbi ty!". Pra, përshëndetjes së tyre ia shtuan edhe pjesën "Mëshira e All-llahut"!".
[Transmeton Buhariu dhe Muslimi]
2. El-Bera ibën Azibi (All-llahu qoftë i kënaqur prej tij!) përcjell se Pejgamberi alejhi selam na ka porositur që t'i veprojmë shtatë gjërat vijuese: "T'i vizitojmë të sëmurët, të përcjellim kufoma, t'i themi "All-llahu të mëshiroftë!" atij që teshtin, t'i përkrahim të dobëtit, t'i ndihmojmë të shtypurve, t'i shtojmë përshëndetjet me selam dhe t'i përmbushim zotimet!".
[Transmeton Buhariu dhe Muslimi]
3. Abdullah ibën Selami (All-llahu qoftë i kënaqur prej tij!) rrëfen se Pejgamberi alejhi selam ka thënë: "O njerëz! Shkëmbeni përshëndetje të paqes, ushqeni njerëzit e pangopur, forconi e përmirësoni lidhjet familjare dhe faluni kur të tjerët janë duke fjetur, kështu do të hyni në Xhennet!".
[Transmeton Tirmidhiu]
4. Ebu Hurejra (All-llahu qoftë i kënaqur prej tij!) rrëfen se Pejgamberi alejhi selam ka thënë: "Kur njëri prej jush e takon vëllanë e vet musliman, le ta përshëndesë atë! Mandej, nëse ndodh që gjatë rrugës i ndan ndonjë pemë, mur apo gur, le ta përshëndesë përsëri!".
[Transmeton ebu Davudi]
5. Ebu Hurejra (All-llahu qoftë i kënaqur prej tij!) rrëfen se Pejgamberi alejhi selam ka thënë: "Besimtari i ka gjashtë obligime kundrejt vëllait të vet besimtar: ta vizitojë kur të sëmuret, të jetë prezent në funeralin e tij, t'i përgjigjet ftesës kur ta ftojë, ta përshëndesë kur ta takojë, të reagojë kur të teshtijë dhe të lutet për të mirën e tij, pa marrë parasysh se a është ai prezent apo jo!".
[Transmeton Nisai]
6. Ebu Hurejra (All-llahu qoftë i kënaqur prej tij!) rrëfen se Pejgamberi alejhi selam ka thënë: "Ai që është me mjet transportues duhet ta përshëndesë atë që është duke ecur; ai që është duke ecur duhet ta përshëndesë atë që është ulur dhe grupi më i vogël (në numër) duhet ta përshëndesë atë që është më i madh!".
[Transmeton Buhariu dhe Muslimi]
7. Ebu Hurejra (All-llahu qoftë i kënaqur prej tij!) rrëfen se Pejgamberi alejhi selam ka thënë: "Ai që është më i ri duhet ta përshëndesë atë që është më i vjetër, ai që është në ecje duhet ta përshëndesë atë që është ulur dhe grupi më i vogël duhet ta përshëndesë grupin më të madh!".
[Transmeton Buhariu]
8. Enesi (All-llahu qoftë i kënaqur prej tij!) tregon: "Pejgamberi alejhi selam kaloi pranë disa djelmoshave dhe i përshëndeti ata!".
[Transmeton Buhariu dhe Muslimi]
9. Enesi (All-llahu qoftë i kënaqur prej tij!) rrëfen se Pejgamberi alejhi selam ka thënë: "Kur t'ju përshëndesin ithtarët e Librit, thuani: "Edhe ju gjithashtu!"!".
[Transmeton Buhariu dhe Muslimi]
10. Usame ibën Zejdi (All-llahu qoftë i kënaqur prej tij!) tregon: "Pejgamberi alejhi selam kaloi pranë një grupi njerëzish ku kishte muslimanë, politeistë, idhujtarë dhe çifutë e Pejgamberi alejhi selam i përshëndeti ata!".
[Transmeton Buhariu dhe Muslimi]
11. Ebu Sejid el-Kudri (All-llahu qoftë i kënaqur prej tij!) rrëfen se Pejgamberi alejhi selam ka thënë: "Kini kujdes në të ulurit ose qëndruarit në rrugë!". Të pranishmit thanë: "O i Dërguari i All-llahut! S'ka alternativë tjetër për neve (ku të qëndrojmë), veçse të qëndrojmë në rrugë!", kurse Pejgamberi alejhi selam ua ktheu: "Atëherë jepjani rrugës hakun që i takon!". I thanë: "O i Dërguari i All-llahut! Cili është haku ndaj rrugës?". Ai u tha: "Ulja e shikimit, mënjanimi i gjërave që pengojnë, urdhërimi për të mirë dhe ndalimi nga e keqja!".
[Transmeton Buhariu dhe Muslimi]
12. Esma bint Jezidi (All-llahu qoftë i kënaqur prej saj!) tregon: "Ishim një grup njerëzish (besimtarësh) në mesin e të cilëve kishte edhe gra dhe Pejgamberi alejhi selam na përshëndeti!".
[Transmeton ebu Davudi, ibën Maxhe dhe Darimi]
13. Imran ibën Husejni (All-llahu qoftë i kënaqur prej tij!) tregon: "Një njeri erdhi te Pejgamberi alejhi selam dhe i tha: "Paqja qoftë mbi ty!", e Pejgamberi alejhi selam ia ktheu përshëndetjen dhe tha: "Dhjetë!". Më pas, erdhi një njeri tjetër dhe tha: "Paqja dhe mëshira e All-llahut qofshin mbi ty!", e Pejgamberi alejhi selam ia ktheu përshëndetjen dhe tha: "Njëzet!". Më pas, erdhi një tjetër dhe tha: "Paqja, mëshira dhe begatitë e All-llahut qofshin mbi ty!", e Pejgamberi alejhi selam ia ktheu përshëndetjen edhe këtij dhe tha: "Tridhjetë (shpërblime)!".
[Transmeton Tirmidhiu dhe ebu Davudi]
14. Muadh ibën Enesi (All-llahu qoftë i kënaqur prej tij!) e transmeton ngjajshëm hadithin paraprak, porse ai shton edhe: "Më pastaj, erdhi edhe një njeri tjetër dhe tha: "Paqja, mëshira, begatitë dhe falja e All-llahut qoftë mbi ty!", kurse Pejgamberi alejhi selam tha: "Katërdhjetë! Kështu rriten shpërblimet!".
[Transmeton ebu Davudi]
15. Ebu Umame (All-llahu qoftë i kënaqur prej tij!) rrëfen se Pejgamberi alejhi selam ka thënë: "Më i miri prej njerëzve është ai që përshëndet i pari!".
[Transmeton Ahmedi, Tirmidhiu dhe ebu Davudi]
16. Amër ibën Shuajbi përcjell nga babai i tij e ky nga gjyshi i tij (All-llahu qoftë i kënaqur nga të gjithë!), i cili e ka dëgjuar Pejgamberin alejhi selam të ketë thënë: "Nuk është prej nesh ai që i imiton të tjerët! Pra, mos i imitoni çifutët dhe të krishterët, ngase përshëndetja e çifutëve është të bërit gjest me gishtërinj, kurse të krishterët përshëndeten duke bërë gjest me pëllëmbë (dorë)!".
[Transmeton Tirmidhiu]
17. El-Bera'i (All-llahu qoftë i kënaqur prej tij!) rrëfen se Pejgamberi alejhi selam ka thënë: "Nuk mund të ndodhë që dy muslimanëve mos t'u falen mëkatet kur ata takohen dhe i flasin njëri-tjetrit për dore!".
[Transmeton ebu Davudi]
18. Enesi (All-llahu qoftë i kënaqur prej tij!) rrëfen se Pejgamberi alejhi selam ka thënë: "O i dashuri im! Kur të shkosh te familja (shtëpia) jote, përshëndeti ata dhe kështu do të ketë bekime edhe për ty, edhe për ta!".
[Transmeton Tirmidhiu]
19. Xhabiri (All-llahu qoftë i kënaqur prej tij!) rrëfen se Pejgamberi alejhi selam ka thënë: "Përshëndetja është para bisedimit!".
[Transmeton Tirmidhiu]
20. Ebu Hurejra (All-llahu qoftë i kënaqur prej tij!) rrëfen se Pejgamberi alejhi selam ka thënë: "Kur ndonjëri prej jush vjen në ndonjë mbledhim, le të japë përshëndetje! Nëse bëhet vend për të që ai të ulet, le të ulet! Ardhësi i parë nuk ka të drejtë më të madhe se ardhësi i dytë!".
[Transmeton ebu Davudi dhe Tirmidhiu]
21. Katade (All-llahu qoftë i kënaqur prej tij!) rrëfen se Pejgamberi alejhi selam ka thënë: "Kur të hyni në ndonjë shtëpi, përshëndetni banorët e saj dhe kur të dilni, gjithashtu, përshëndetni ata!".
[Transmeton Bejhakiu]
22. Ebu Hurejra (All-llahu qoftë i kënaqur prej tij!) rrëfen se Pejgamberi alejhi selam ka thënë: "Nuk ka të mira në të qëndruarit në rrugë, në përjashtim për atë që e kthen përshëndetjen kur të përshëndetet, atë që e ul shikimin dhe për atë që ndihmon, pa marrë parasysh se çka!".
[Sharhi-Sunneh]
23. Abdullah ibën Amri (All-llahu qoftë i kënaqur prej tij!) tregon se kur një njeri e pyeti Pejgamberin alejhi selam se cila trajtë e Islamit është më e mira, ai pati thënë: "T'i ushqesh dhe t'i përshëndesësh ata që i njeh dhe ata që nuk i njeh!".
[Transmeton Buhariu dhe Muslimi]
24. Enesi (All-llahu qoftë i kënaqur prej tij!) tregon se njeri e pyeti Pejgamberin alejhi selam: "O i Dërguari i All-llahu! Kur ndonjëri prej nesh e takon vëllanë ose mikun e vet, a duhet t'i bëjë me kokë (në shenjë përshëndetjeje)?", kurse Pejgamberi alejhi selam i tha: "Jo!". Më pas, i tha: "A duhet ta përqafojë dhe ta puthë?". (Pejgamberi) Tha: "Jo!". Më pas, i tha: "A duhet ta përshëndesë me dorë?". (Pejgamberi) Tha: "Po!".
[Transmeton Tirmidhiu]
25. Ebu Umame (All-llahu qoftë i kënaqur prej tij!) rrëfen se Pejgamberi alejhi selam ka thënë: "Mënyra më e mirë e të vizituarit të ndonjë të sëmuri është që ta vësh dorën në ballin e tij ose mbi dorën e tij dhe ta pyesësh se si është dhe mënyra më e mirë e të përshëndeturit është ajo (përshëndetja) me dorë!".
[Transmeton Tirmidhiu (hadith i dobët)]
26. Ata'a Hursani (All-llahu qoftë i kënaqur prej tij!) rrëfen se Pejgamberi alejhi selam ka thënë: "Përshëndetuni me dorë me njëri-tjetrin, do t'ju shlyhen mëkatet; dërgoni dhurata njëri-tjetrit, do të duheni edhe më shumë dhe do t'ju hiqet shpirtligësia!".
[Transmeton Maliku (hadith i mangët)]

Përktheu nga anglishtja: Arsim JONUZI, 27.06.2008

Shkëputur nga libri: Kodi Social dhe Moral në Islam
Autor: Muhammed el-Kudri

__________________
Allah,je t'en supplie aide mes frères et mes soeurs en Gaza